A.
Rumah Sakit Immanuel mulia paga eeko logorak wone.
1. Nit Wilayah Yamo nen, Rumah
sakit Immanuel nogo ti, Ala nen GIDI Wilayah Yamo ninake aret wa’niragagerak
me, nit abok nen ninagerak aret mbako logonet
unde wako logowok o, yogorak.
2. Rumah sakit Immanuel nogo
op logowok nduk, it Badan Pendiri dan Badan Pengurus nen yi eeriyak ndi eeriyak
wone lenggenogo yo’nirogwe iinok, nit Gereja nen konembunuk ndak-ndak aret eeko
logowok o, yogorak.
3. Tenaga Rumah sakit Immanuel
eeko logorak kenok ti, Kepercayaan Gereja lain nen Doktrin GIDI eeko monggorak
ndak-ndak eeko menggaarak kenok ninom eeko logorak op o, yogorak.
4. It tenaga Gereja pertobatan
mendek nogo, Doktrin GIDI eeko monggoorak abenok ndak-ndak lek kwe, it mendek
Doktin eeko menggaarak nogo mbo punuk, Rumah sakit mban eeko logorak kenok,
ninom op aret eeko logorak o, yogorak. Doktrin at mendek wonok nggwi wororak
lek o, yogorak.
B.Rumah Sakit ake Nggereja nen eeko logorak wone
5. Rumah
Sakit nogo ti, Gereja mendek aret wonage me, jalan terus eeke logowak
nduk, nit Nggereja nen eeko logorak
aret-o, yogorak.
6. Dana
Sehat nogo mondok tiyaappogo logowok o, yogorak.
7. Kweebi
Rumah Sakit nogo jalan abu abe eeke kenok, it KEMA INJIL inom, GIDI TOLIKARA
inom, GIDI MAMBERAMO inom, it BAPTIS inom, Dana Sehat jenggwanirogo logowak
nduk, yorogo logowok o, yogorak.
8. Yi paga
ndi paga wu nggwi wagak eeruwak nduk, alom koonogo pit nawok o, yogorak. (SAHAM
TETAP nogo mendek)
9. Rumah
Sakit op logowak nduk, yi paga ndi paga usaha Dana kwaarit nogo logowok o,
yogorak.
10. Yogondak ti, ninapuri Pemerintah
Daerah nen yenggwanirogwe me, ti paga mban niniki panggonak logorak ti lek o,
Ata, it ninamendek aret me, mba’nuk,
eerit nogo logorak-o. yogorak.
11. It Gereja
Kota-kota wonogwe nogo ti, Inarumah sakit wuppatinuk, inalik nen aret usaha
eekologo menggarak me, nit ndak-ndak aret eeko logowok nduk, warinogo
piinaneegwaarak me, nit Gereja nen ndak-ndak aret eerit laganggo logowok o,
yogorak.
12. Rumah
Sakit op logorak nogo ti, tenaga Dokter
inom, Perawat inom, Mantri inom, ugwe wonage me, nit Gereja nen abet aret
tamban mondok kulinik-kalini eeko logowok o, yogorak.
13. Aap yabu
Rumah sakit Immanuel paga eeko logorak kenok, aap iniki Yetut abet mbakerak
Ala aput iniki yanggonak kenok, at nen
an Ala eyabu Rumah sakit paga eeke logokit aret o, mbake kenok, ti nen eeko
logorak o, yogorak.
14. Ndi, aap
iniki abet mbaka’lek Ala aput lek kenok, It Iniki wu paga lonik menggaarak
kenok, aap iniki agun-agun eeko menggaarak kenok, iniki yi paga ndi paga wonogo menggaarak
kenok, yabu Rumah Sakit time eeko
logorak lek o, yogorak.
15. Aap yi
yabu ndi yabu Rumah sakit paga eeko logorak mbakwi kenok, Gereja nen kwaarogo
Klasis wagarogwe iinok, it Klasis nen inabut mbambunuk op aret mbakwi kenok,
Rekomendasi wagarogo logorak-o, yogorak.
16. Ndi,
Rekomendasi nogo wonok, It Badan Pediri
inom, Badan Pengurus inom, wonogome nappigo logorak. yogorak.
17. Ndi,
napigwi iinok, it Badan Pediri inom, Badan Pengurus inom nen Peraturan Rumah Sakit Immanuel paga eeko
logorak mbanak wonage nogo paga yorogwe iinok, it nen ti ndak-ndak eeko logorak
eeo, yogwe iinok, mambigo logorak o, yogorak.
18. Tujuan
Rumah Sakit nogo ti, ambi aakumi andi nogo obeelom aganakak nduk wonage
menggerak. Ndi, ambi, aakumi Yetut ineenggo’lek kenok, Ala wone yoragak nduk
wonage menggerak.
19. Nit Badan
Lengkap Wilayah Yamo nen, aap Gembala ilik, ata, Pendeta a, tetap Rumah sakit inarum logowak
nduk, Leenogo piigo logorak-o, yogorak.
Siap tahun tetap eerit laganggo logorak-o, yogorak.
C.
Gembala Rumah Sakit Immanuel paga logonet eeke logorak wone
20. Yabu eekalek logonet, Ala wone
mamunirage logorak.
21. Andi nogo
inalitak iniki mbakwi ambi wonage kenok paganogo punuk, Inake tamban eeke logorak.
22. Andi nogo
abet mbaka’lek kenok, Abet mbaruwak nduk, yorage logorak.
23. Ala apuri
Gereja nen aakumi andi tamban eerinabi nggurak kenok, at jatwal eereemegerak
nogo mukok mban eerinabi nggogo logorak.
24. Aap
Gembala Rumah Sakit ndomba andi abe ndegeninako logorak karunia kilirik kenok,
leenogo pogo logorak o, yogorak.
25. Rumah
Sakit nogo ti, Satu Gereja ambi wurik wonage pogom aret mbako logorak.
26. Yetut
Ndarak panggoni wage kenok, Natal it inalik aret eeko logorak.
27. Gembala nogo nen Natal
paga a, Hari Kamis paga a, Ala wone aap Kiwone yaga alik ambi nen yora
wogo logorak nduk, nggino yorogo logorak op aret-o.
D.Tenaga Rumah Sakit Immanuel
ugwe wonage nogo ake tamban eeko logorak
wone
25. Tenaga
Dokter Rumah Sakit paga menggarak nogo ti, 15 kuli nen nok 20 kuli wonogo
menggaarak kwe, nit mbat-mbet uugwe wonage nogo ti, 6 Dokter aret inake
tamban eeko logorak o, yogorak.
26. Perawat
Rumah Sakit paga menggarak nogo ti ambik menggarak kwe, nit mbet-mbet uugwe
nogo ti, ineebe 8 uugwe wonage me, inake
Tamban eeko logowok o, yogorak.
27. Nggwen Rumah sakit Yagat
wirik lek wonage nogo wurogo mamburak o, yogorak.
28. Yabu Rumah Sakit Immanuel
paga eeko logorak kenok, Pegawai kenok, eeko logorak lek-o. Ata, we Suasta
kenok mban we Ala eyabu aret me, eerikit o mbake ti kenok mban eeko logorak o,
yogorak. Rumah sakit Immanuel nogo ti, Gaji anduk lek o, ata, Pelayanan anduk
eeko menggaarak-o.
29. Nggween Rumah Sakit paga
wonage nogo Yabu we agun eeko logorak lek-o, yogorak. Ata, Kepentingan Rumah
sakit ti ake kenok mban eeko logorak.
E. Polik Klinik paga eeriyak wone.
27. Polik
Klinik Daera paga wurik wonage nogo ti, obat eerit nogo logorak aret me, Nit
Gereja nen Polik wurik nogo ogobakkigirit noorak aret o, yogorak.
28. Polik klinik
nogo Gereja nen abu aret ogobakkigikwi niinok, Rumah Sakit Immanuel nen eebe
eeriyak nogo eerugun-o, yogorak. Ndi, alik kooniyak kenok ti, koonggo logorak
aret-o yogorak me, Eebe atenggen age amugurok koonggo logogun-o.
29. Dana sehat
wu Inggen kunggo logorak nogo, setiap polik klinik nen, yonggoko logorak aret
o, yogorak.
30. Tenaga
mantri-mantri polik Klinik paga eerit nogo logorak nogo, Dokter nen Latihan
aganaburak nduk, Rumah sakit napiya wogo logorak-o, yogorak.
32. Kesehatan
lingkungan kembersihan Masyarakat inom, Makanan Berngizi inom, tiyapuwok-o,
yogorak.
